Mae AS Gogledd Cymru, Mark Isherwood, wedi codi pryderon ynglŷn ag effaith Bil Gwasanaethau Bysiau (Cymru) Llywodraeth Cymru ar fusnesau bach, cymunedau gwledig a theithwyr yn y Gogledd.
Wrth holi Ysgrifennydd y Cabinet dros Drafnidiaeth yng nghyfarfod y Senedd y prynhawn yma, rhybuddiodd Mr Isherwood y gallai'r newidiadau arwain at fusnesau rhai gweithredwyr yn mynd i’r wal.
Meddai yn Siambr y Senedd:
“Mae gweithredwyr bysiau bach a chanolig sy'n gweithredu ledled gogledd Cymru yn poeni am effaith eich Bil Gwasanaethau Bysiau (Cymru) ar fusnesau bach, cymunedau gwledig a theithwyr, sydd ond eisiau gwasanaeth dibynadwy a fforddiadwy.
“Er bod llawer o sôn yn eich Bil am lunio gwasanaethau er budd y teithiwr, mae Bus Users UK yn dweud nad oes llawer o sôn am ymgynghori â theithwyr i ddarparu gwasanaethau sy'n diwallu eu hanghenion’.
“Er y bydd yr eithriad yn y Bil ar gyfer gwasanaethau trafnidiaeth cymunedol yn galluogi gwasanaethau ar alw i barhau, ni fydd hynny'n digwydd fel rhan o rwydwaith masnachfraint mewn ardal.
“O ystyried eich datganiadau blaenorol y bydd eich model masnachfraint yn wahanol i'r model ym Manceinion, lle codwyd y dreth gyngor i ariannu eu cynllun, sut rydych chi'n ymateb i bryderon fod eich cynigion yn creu perygl o yrru gweithredwyr bysiau bach teuluol yng ngogledd Cymru allan o fusnes?”
Yn ei ymateb, mynnodd Ysgrifennydd y Cabinet: “rwy'n credu bod masnachfreinio bysiau yn cynnig dyfodol cadarnhaol iawn i farchnad BBaCh mewn bysiau.”
