Heddiw, mae’r AS Rhanbarthol dros Ogledd Cymru a Chadeirydd Grŵp Trawsbleidiol y Senedd ar Ofal Hosbis a Gofal Lliniarol, Mark Isherwood, wedi cwestiynu Ysgrifennydd y Cabinet dros Gyllid a'r Gymraeg ynghylch y trafodaethau y mae wedi'u cynnal gyda Llywodraeth y DU ynghylch Bil Oedolion â Salwch Angheuol (Diwedd Oes) San Steffan er mwyn sicrhau bod gofyniad i gofnodi a yw claf yn siaradwr Cymraeg.
Wrth siarad yng nghyfarfod y Senedd y prynhawn yma, tynnodd Mr Isherwood sylw at bryderon a godwyd gan weithwyr gofal iechyd proffesiynol yng Ngogledd Cymru ynglŷn â'r Bil.
Meddai:
“Mae nifer o weithwyr gofal iechyd proffesiynol yng ngogledd Cymru wedi fy nghopïo i mewn i'w llythyrau ymgyrchu am anghenion penodol siaradwyr Cymraeg yn gysylltiedig â'r Bil Oedolion sydd â Salwch Terfynol (Diwedd Oes).
“Ar ôl i mi gyfeirio hyn at y grŵp trawsbleidiol ar ofal hosbis a gofal lliniarol, a gadeirir gennyf, rhannodd Hospice UK hyn gyda'u cymheiriaid sy'n ymgysylltu â phwyllgor y Bil yn Senedd y DU ar welliannau, a bydd cymorth i farw yn eitem agenda allweddol yng nghyfarfod ar y cyd y grwpiau trawsbleidiol ar ofal hosbis a gofal lliniarol ac ar angladdau a phrofedigaeth ar 2 Ebrill, pan fydd y Farwnes Finlay yn siarad.
“Fel y dywed y llythyr, 'Ni fydd yn bosibl gwneud unrhyw asesiad o bresenoldeb neu absenoldeb gorfodaeth os yw'r meddygon cydlynol ac annibynnol ac unrhyw weithwyr gofal iechyd proffesiynol eraill sy'n gysylltiedig yn cael y sgyrsiau angenrheidiol yn Saesneg gyda siaradwr Cymraeg. '.
“Pa ymgysylltiad a gawsoch chi, felly, gyda phwyllgor y Bil yn San Steffan, neu y byddwch chi'n ei gael gyda Llywodraeth y DU, ynglŷn â hyn a phleidlais mis Hydref diwethaf yn y Senedd hon yn erbyn cefnogi'r ddeddfwriaeth honno yn Senedd San Steffan?”
Yn ei ymateb, dywedodd Ysgrifennydd y Cabinet: Mae angen i mi wneud y pwynt eto nad Bil Llywodraeth yw hwn, felly nid oes trafodaeth rhwng Llywodraethau yn ei gylch, oherwydd nid y Llywodraeth yn San Steffan sy'n gyfrifol am y Bil. Bil Aelodau preifat yw'r Bil, ac mae ein gweithdrefnau ein hunain ar gyfer ymdrin ag unrhyw gynnig cydsyniad deddfwriaethol yn wahanol ar gyfer Biliau Aelodau preifat i'r hyn ydynt ar gyfer Biliau'r Llywodraeth
Wrth siarad ar ôl y cyfarfod, dywedodd Mr Isherwood:
"Yn groes i'w datganiadau, mae gan Lywodraeth y DU bwerau sylweddol i ddylanwadu ar hynt Biliau Aelodau Preifat yn Senedd y DU. Mae'n gymharol brin i Filiau Aelodau Preifat basio drwy'r broses ddeddfwriaethol a dod yn Ddeddfau Seneddol ac er eu bod weithiau'n pasio, mae hyn yn digwydd yn aml am y rheswm syml bod Llywodraeth y DU yn eu cefnogi."
