Yn Wythnos Ymwybyddiaeth MS 2025, mae AS Gogledd Cymru, Mark Isherwood, wedi gofyn i Lywodraeth Cymru pa gymorth maen nhw'n ei ddarparu i bobl â Sglerosis Ymledol.
Heddiw, wrth alw am Ddatganiad Llywodraeth Cymru ar y mater yn y Datganiad Busnes yn y Senedd, siaradodd Mr Isherwood hefyd am y digwyddiad y bydd yn ei noddi yr wythnos nesaf i ddathlu thema'r Wythnos Ymwybyddiaeth MS eleni, sef 'Sgyrsiau am MS'.
Meddai:
“Rwy'n galw am Ddatganiad gan Lywodraeth Cymru ar gefnogaeth Llywodraeth Cymru i bobl sydd â sglerosis ymledol, cyflwr niwrolegol sy'n gwaethygu.
“Mae mwy na 6,000 o bobl yng Nghymru yn byw gydag MS, ac mae bron i 300 o bobl yn cael diagnosis o MS yng Nghymru bob blwyddyn. Yr wythnos hon yw Wythnos Ymwybyddiaeth MS 2025, o 28 Ebrill hyd 4 Mai. Ddydd Mercher nesaf, fe fyddaf i'n noddi digwyddiad amser cinio Cymdeithas MS Cymru ar gyfer ddathlu thema eleni sef 'Sgyrsiau MS'—sut beth yw byw gydag MS, pa wasanaethau ac ymchwil sy'n gwneud gwahaniaeth yng Nghymru heddiw, a'r hyn y mae angen i ni fod yn ei wneud fel arall.
“Bydd pobl sy'n byw gydag MS wrth law i siarad am eu profiadau nhw o fyw gyda'r cyflwr, ac fe fydd MS Society Cymru yn arddangos data newydd a thriniaethau newydd sydd yn yr arfaeth ar gyfer y ddau fath o MS.”
Yn ei hymateb, diolchodd y Trefnydd, Jane Hutt AS, i Mr Isherwood am dynnu sylw at Wythnos Ymwybyddiaeth MS.
Ychwanegodd: “Rwy’n siŵr y bydd Aelodau o’r Senedd am fod yn bresennol ac ymgysylltu, ac wrth gwrs bydd gan Ysgrifennydd y Cabinet dros Iechyd a Gofal Cymdeithasol ddiddordeb arbennig yn yr wythnos MS, a byddwn yn edrych ar unrhyw wybodaeth y bydd angen i ni ei rhannu ynglŷn â hynny.”
