Mae’r AS dros Ogledd Cymru a Chadeirydd Grŵp Trawsbleidiol y Senedd ar Anabledd, Mark Isherwood, wedi galw heddiw ar i Lywodraeth Cymru wasanaethu unigolion anabl a gofalwyr ledled Cymru yn well drwy newid y Cynllun Trwyddedau Parcio Bathodyn Glas presennol yng Nghymru.
Mae Mr Isherwood wedi bod yn tynnu sylw at y problemau sy’n wynebu trigolion anabl yn y Gogledd wrth wneud cais am Fathodynnau Glas a'u cadw, ac mae’n galw am weithredu i fynd i'r afael â nhw.
Wrth godi'r mater yn y Senedd eto heddiw gydag Ysgrifennydd y Cabinet dros Gyfiawnder Cymdeithasol, y Trefnydd a'r Prif Chwip, Jane Hutt AS, dywedodd:
Yn gynharach y mis hwn, yn ei ymateb diweddaraf i fy ngohebiaeth ar ran etholwr ynghylch y cynllun bathodyn glas, eglurodd yr Ysgrifennydd trafnidiaeth, unwaith eto, fod awdurdodau lleol yn gweinyddu'r cynllun gan ddefnyddio canllawiau a phecyn cymorth a ddarparwyd gan Lywodraeth Cymru.
Fodd bynnag, dehongliad anghyson o'r brig i lawr gan awdurdodau lleol o'r canllawiau hyn sy'n arwain dro ar ôl tro at wrthod neu wrthod adnewyddu bathodyn glas i ymgeiswyr anabl.
Mae gwrthodiad parhaus Llywodraeth Cymru i ddarparu bathodyn gydol oes i'r rheini â chyflyrau gydol oes nad ydynt yn gwella yn groes i resymeg ac yn gwrthbrofi honiad Llywodraeth Cymru eu bod yn hyrwyddo'r model cymdeithasol o anabledd.
Pa gamau y byddwch chi'n eu cymryd, felly, i sicrhau y rhoddir sylw priodol i ganfyddiadau'r arolwg rhanddeiliaid a gynhaliwyd yr haf hwn gan gwmni buddiant cymunedol STAND North Wales, a gafodd 636 o ymatebion o 20 sir yng Nghymru mewn dim ond 25 diwrnod, ac a ganfu:
'Mae’r system Bathodyn Glas bresennol yng Nghymru yn creu rhwystrau yn hytrach na'u dileu, gan weithio’n groes i amcanion y ddeddfwriaeth hawliau pobl anabl'?
Argymhellodd newidiadau, gan gynnwys bathodyn gydol oes, i wasanaethu unigolion anabl a gofalwyr ledled Cymru yn well a chyflawni cyfrifoldebau cyfreithiol a moesol Llywodraeth Cymru. Hoffwn glywed a fyddwch chi'n rhoi sylw i hynny.
Yn ei hymateb, dywedodd Ysgrifennydd y Cabinet fod Llywodraeth Cymru wedi derbyn yr holl argymhellion o adolygiad y rhaglen ymchwil fewnol o'r cynllun Bathodyn Glas yng Nghymru, a gyhoeddwyd ar 21 Mai.
Ychwanegodd:
Nod yr adolygiad oedd asesu cryfder y cynllun ac archwilio a ellid ymestyn meini prawf cymhwysedd, yn enwedig ar gyfer unigolion â chyflyrau gydol oes. Credaf mai'r pwynt hollbwysig, fel y gwyddoch, yw bod Ysgrifennydd y Cabinet wedi cynnull grŵp arbenigol, gan weithio mewn partneriaeth ag awdurdodau lleol a Chymdeithas Llywodraeth Leol Cymru, i archwilio pob opsiwn i rannu data'n well ac i leihau'r baich sy'n wynebu pobl ag angen gwirioneddol am y lleoedd parcio hygyrch y gall y bathodyn glas eu cynnig.
Wrth siarad ar ôl y cyfarfod, dywedodd Mr Isherwood:
"I lawer o oedolion a phlant anabl, a'u teuluoedd, mae cael Trwydded Parcio Bathodyn Glas yn allweddol i gael mynediad at wasanaethau a chyfleusterau yng nghanol trefi a gwneud y mwyaf o'u hannibyniaeth. Os yw Ysgrifennydd y Cabinet eisiau 'archwilio pob opsiwn' gyda'r arbenigwyr go iawn, dylai wneud yr hyn mae STAND North Wales CIC wedi'i wneud - a gofyn iddyn nhw."
