Gyda thennis proffesiynol yn dychwelyd i Gymru yr wythnos hon am y tro cyntaf ers 30 mlynedd, mae AS Gogledd Cymru, Mark Isherwood, wedi tynnu sylw at yr angen am fwy o gyrtiau tennis dan do yng Nghymru ac wedi galw ar Lywodraeth Cymru i weithio gyda'r Gymdeithas Tennis Lawnt a Tennis Cymru i lenwi'r bwlch hwn mewn cyfleusterau.
Dechreuodd Pencampwriaeth Agored Lexus Wrecsam, y digwyddiad tennis merched mwyaf ym Mhrydain Fawr y tu allan i'r tymor cwrt glaswellt, yng Nghanolfan Tennis Wrecsam ddoe.
Wrth siarad yn Siambr y Senedd ddoe, cyfeiriodd Mr Isherwood at y twrnamaint a galwodd am Ddatganiad gan Lywodraeth Cymru ar gefnogaeth i gyfleusterau tennis yng Nghymru, gan dynnu sylw at y prinder cyrtiau tennis dan do yng Nghymru.
Dywedodd:
Mae'r wythnos hon yn nodi dychwelyd tennis proffesiynol i Gymru am y tro cyntaf ers 30 mlynedd, wrth i Dwrnamaint Agored Lexus Wrecsam ddechrau yng Nghanolfan Tennis Wrecsam, y digwyddiad tennis merched mwyaf ym Mhrydain Fawr y tu allan i'r tymor cwrt glaswellt. Mae'r prif atyniad yn dechrau heddiw.
Er bod y twrnamaint yn dilyn buddsoddiad sylweddol mewn cyfleusterau tennis a padel ledled Cymru, dim ond 37 o'r 1,100 o gyrtiau tennis Cymru sydd wedi eu gorchuddio, y ganran isaf ym Mhrydain Fawr, ac ymhell oddi tan gymheiriaid yn Ewrop, er gwaethaf y galw am dennis dan do yng Nghymru. Mae'r Gymdeithas Tennis Lawnt a Tennis Cymru yn awyddus i weithio gyda Llywodraeth Cymru i fynd i'r afael â'r bwlch hwn o ran cyfleusterau, ac rwy'n galw am ddatganiad yn unol â hynny.
Wrth ymateb, dywedodd y Trefnydd, Jane Hutt AS:
Fe fydd Tennis Cymru, rwy'n siŵr, wrth eu boddau oherwydd i chi godi hyn heddiw, oherwydd mae hon yn gamp bwysig ac yn rhan o'n hamrywiaeth o gyfleoedd o ran chwaraeon yng Nghymru. Felly, fe wnaf i godi hyn hefyd gyda'r Gweinidog Diwylliant, Sgiliau a Phartneriaeth Gymdeithasol.
Gellir gwylio Pencampwriaeth Agored Lexus Wrecsam ar BBC iPlayer, gwefan BBC Sport a'r Tennis Channel.
