Mae’r AS Rhanbarthol dros Ogledd Cymru a Chadeirydd Grwpiau Trawsbleidiol y Senedd ar Anabledd ac ar Awtistiaeth, Mark Isherwood, wedi ysgrifennu at Gyngor Sir y Fflint yn amlinellu ei bryderon ynghylch cau Gwasanaeth Anabledd Teuluoedd Sir y Fflint (FFDS).
Mae llythyr wedi cael ei anfon at deuluoedd sy'n defnyddio’r Gwasanaeth yn dweud y bydd y gwasanaeth yn cau'n barhaol o 31 Mawrth 2026, gan fod Cyngor Sir y Fflint yn "ailstrwythuro eu gwasanaethau".
Mae'n nodi ymhellach: "Ar hyn o bryd, nid ydym wedi derbyn unrhyw wybodaeth am sut y bydd y gwasanaeth newydd yn cael ei ddarparu neu sut olwg fydd ar y trefniadau pontio".
Mae Gwasanaeth Anabledd Teuluoedd Sir y Fflint yn cael ei weithredu gan yr elusen Action Children ac mae'n gweithio i amddiffyn a chefnogi plant, pobl ifanc a theuluoedd trwy ddarparu gofal a chefnogaeth ymarferol ac emosiynol, gan sicrhau bod pob llais yn cael ei glywed.
Yn ei lythyr at Gyngor Sir y Fflint, mae Mr Isherwood yn pwysleisio pa mor bwysig yw'r gwasanaeth i deuluoedd ac yn galw am wybodaeth am yr hyn y bydd gwasanaeth newydd yn ei ddarparu.
Mae ei lythyr yn nodi:
"Fel y gwyddoch, rwy'n ysgrifennu atoch yn rheolaidd ar ran oedolion a phlant anabl yn Sir y Fflint, ac oedolion a phlant yn Sir y Fflint sydd â chyflyrau niwroddatblygiadol, ynglŷn â'u hawliau a'u hanghenion gofal, cymorth ac addysgol.
"Rwy'n derbyn gohebiaeth gan etholwyr ynglŷn â hyn bron bob dydd, yn cynnwys, er enghraifft, un neges a ystyriwyd heddiw, a anfonwyd ar ran sawl mam sydd wedi’u heffeithio:
'Yn Sir y Fflint ac ardal Wrecsam, mae’n her wirioneddol cael gafael ar y cymorth angenrheidiol i alluogi gwell rhianta, pan fo gan y mamau eu hunain neu'r plentyn gyflwr niwroddatblygiadol.
'Mae gweithwyr cymdeithasol plant mewn sawl achos wedi dangos diffyg gwybodaeth am gyflyrau niwroddatblygiadol, sy'n golygu bod mamau yn teimlo eu bod yn destun gwahaniaethu. Mae mamau yn cael eu beio am ffugio salwch y plentyn, pan maen nhw'n ymbilio ac yn ymladd i sicrhau cymorth i’r plentyn. Mae hyn yn cael ei ystyried fel problem gan wasanaethau plant ar draws Sir y Fflint a Wrecsam'.
"Fel y gwyddoch, fi yw Cadeirydd hirsefydlog y Grwpiau Trawsbleidiol ar Awtistiaeth ac ar Anabledd, lle mae'r materion hyn wedi cael eu codi dro ar ôl tro.
"Yn y cyd-destun hwn, rwy'n bryderus iawn felly fy mod wedi derbyn copi o’r ohebiaeth atodedig gan Wasanaeth Anabledd Teuluoedd Sir y Fflint, yn nodi y bydd y gwasanaeth yn cau'n barhaol o 31 Mawrth 2026 ac nad ydyn nhw wedi derbyn unrhyw wybodaeth am sut y bydd y gwasanaeth newydd yn cael ei ddarparu neu sut olwg fydd ar y trefniadau pontio.
"Byddwn felly yn ddiolchgar pe gallech chi roi eich sylw i hyn a chadarnhau eich ffordd weithredu arfaethedig."
Ychwanegodd Mr Isherwood:
"Mae Gwasanaeth Anabledd Teuluoedd Sir y Fflint yn achubiaeth i lawer o deuluoedd ledled y Sir a bydd cau’r gwasanaeth yn golygu bod rhieni a phlant yn colli cefnogaeth hanfodol.
"Mae angen i Gyngor Sir y Fflint weithredu ar unwaith i ddarparu parhad cefnogaeth, gan weithio gyda'r teuluoedd i sicrhau nad oes unrhyw un yn cael ei adael i wynebu'r heriau hyn ar eu pen eu hunain."
