Ar ôl cyd-noddi a mynychu’r 21ain ‘Digwyddiad Gwyddoniaeth yn y Senedd 2025’ blynyddol ddoe, mae AS Gogledd Cymru, Mark Isherwood, yn galw am i Gwricwlwm i Gymru newydd Llywodraeth Cymru esblygu ochr yn ochr â chyflymder y newid gwyddonol a thechnolegol.
Trefnwyd y digwyddiad gan y Gymdeithas Gemeg Frenhinol mewn cydweithrediad â chymuned wyddonol a pheirianneg Cymru. Thema eleni oedd “Addysg a’r Gweithlu yn y Dyfodol”.
Wrth siarad ar ôl y digwyddiad, dywedodd Mr Isherwood:
“Rydyn ni ar gyrion trawsnewidiad cymdeithasol pellgyrhaeddol. Mae deallusrwydd artiffisial, newid hinsawdd, biotechnoleg, a throsglwyddo ynni yn ail-siapio ein bywydau ar hyn o bryd. Bydd sut rydyn ni’n addysgu heddiw yn dylanwadu ar sut fyddwn ni’n ffynnu yfory.
“Os ydyn ni am adeiladu gweithlu yn y dyfodol sy’n hyblyg, cynhwysol a blaengar, mae’n rhaid i ni adeiladu system addysg sy’n nodweddu hynny hefyd.
“Mae’n rhaid i ni sicrhau bod Cwricwlwm i Gymru newydd Llywodraeth Cymru yn esblygu ochr yn ochr â newid gwyddonol a thechnolegol.
“Fel yr awgrymwyd yn y Grŵp Trawsbleidiol ar Wyddoniaeth, Technoleg, Peirianneg, Mathemateg a Meddygaeth, STEMM, efallai ei bod hi’n bryd ailedrych ar sut mae’r cwricwlwm hwn yn cysylltu’n uniongyrchol ag anghenion y farchnad lafur - gyda ffocws penodol ar y sgiliau sydd eu hangen ar gyfer yr economi werdd, gweithgynhyrchu uwch, ac arloesi digidol: gan integreiddio meysydd datblygol fel Deallusrwydd Artiffisial, gwyddor data, a thechnolegau gwyrdd, ymwreiddio cyfleoedd ar gyfer dysgu rhyngddisgyblaethol, a chefnogi athrawon gyda’r datblygiad proffesiynol, yr amser a’r adnoddau i wireddu’r weledigaeth hon.
“Mae cyflwyniadau i’r Grŵp Trawsbleidiol hefyd wedi tynnu sylw at effaith carlam Deallusrwydd Artiffisial ar addysg a diwydiant.
“Er mwyn paratoi ar gyfer hyn, mae’n rhaid i ni: ymwreiddio llythrennedd Deallusrwydd Artiffisial ar draws y cyflenwad addysg, uwchsgilio ein gweithlu presennol gyda hyfforddiant parhaus a hygyrch, sicrhau nad yw moeseg, tegwch ac atebolrwydd yn agweddau atodol ond yn elfennau craidd o sut rydyn ni’n addysgu ac yn cymhwyso Deallusrwydd Artiffisial, a sicrhau bod technolegau datblygol yn cael eu deall, eu herio a’u defnyddio i adeiladu cymdeithas well.
“Er bod graddau Prifysgol yn aml yn cael eu hystyried fel y prif lwybr ar gyfer gyrfaoedd STEMM, mae economi wyddoniaeth a thechnoleg fodern yn cael ei phweru i’r un graddau gan dechnegwyr, prentisiaid ac arbenigwyr galwedigaethol ag y mae gan ymchwilwyr PhD - ac mae’n rhaid i ni drin pob llwybr i mewn i STEMM gyda’r un dilysrwydd, a’u cefnogi a’u dathlu yn yr un modd.”
