Gyda Llywodraeth Cymru yn parhau i eirioli dros ddatganoli Ystad y Goron, mae AS Gogledd Cymru, Mark Isherwood, wedi ei herio am y datganiad gan Ysgrifennydd Gwladol Cymru yn Llywodraeth y DU "na fyddai hynny'n arwain yn awtomatig at fwy o arian i Lywodraeth Cymru".
Yng nghyfarfod y Senedd ddoe, rhoddodd y Dirprwy Brif Weinidog ac Ysgrifennydd y Cabinet dros Newid Hinsawdd a Materion Gwledig ddatganiad ar 'Ddyfodol Ystad y Goron yng Nghymru'.
Dechreuodd trwy ddatgan:
"Heddiw hoffwn roi'r wybodaeth ddiweddaraf i'r Aelodau ar ein dull arfaethedig ar gyfer gweddill y tymor seneddol hwn o ran hyrwyddo achos dros ddatganoli Ystad y Goron i Gymru.
"Rydym yn glir y dylai Ystad y Goron fod yn gyfrifoldeb i'r Llywodraeth Ddatganoledig yng Nghymru."
Wrth ymateb i'r Datganiad, dywedodd Mr Isherwood:
"Ym mis Mehefin, dywedodd yr AS Llafur dros Ddwyrain Caerdydd, Jo Stevens, sy'n digwydd bod yn Ysgrifennydd Gwladol Cymru, wrth Senedd y DU, a dyfynnaf, 'Hyd yn oed pe bai' - datganoli Ystâd y Goron - 'gellid ei wneud heb beryglu'r refeniw, ni fyddai hynny'n arwain yn awtomatig at fwy o arian i Lywodraeth Cymru, oherwydd byddai unrhyw refeniw a gadwyd ganddynt yn debygol o gael ei wrthbwyso drwy ostyngiadau i'r grant bloc, fel sy'n digwydd yn yr Alban'. Oedd hi'n iawn?"
Atebodd Ysgrifennydd y Cabinet: "Dyma'n union pam rydyn ni wedi sefydlu'r grŵp, i weithio trwy'r ystyriaethau ariannol, llywodraethu a phob ystyriaeth ymarferol arall".
Wrth siarad wedyn, dywedodd Mr Isherwood:
"Rydym yn gwrthwynebu datganoli’r pŵer hwn i Lywodraeth Cymru. Mae'n ddiangen ac yn anniogel!"