Gyda Llywodraeth Cymru yn parhau i eirioli dros ddatganoli Ystad y Goron, mae AS Gogledd Cymru, Mark Isherwood, wedi eu herio ynghylch y datganiad gan Ysgrifennydd Gwladol Cymru yn Llywodraeth y DU "na fyddai'n arwain yn awtomatig at fwy o arian i Lywodraeth Cymru".
Yng nghyfarfod y Senedd ddoe, rhoddodd y Dirprwy Brif Weinidog ac Ysgrifennydd y Cabinet dros Newid Hinsawdd a Materion Gwledig ddatganiad ar 'Ddyfodol Ystad y Goron yng Nghymru'.
Dechreuodd trwy ddatgan:
“Heddiw hoffwn roi'r wybodaeth ddiweddaraf i'r Aelodau ar ein dull arfaethedig ar gyfer gweddill y tymor seneddol hwn o ran hyrwyddo achos dros ddatganoli Ystad y Goron i Gymru.
“Rydyn ni'n glir y dylai Ystad y Goron fod yn gyfrifoldeb i'r Llywodraeth ddatganoledig yng Nghymru.”
Wrth ymateb i'r Datganiad, dywedodd Mr Isherwood:
“Ym mis Mehefin, dywedodd Aelod Seneddol Llafur Dwyrain Caerdydd, Jo Stevens, sy'n digwydd bod yn Ysgrifennydd Gwladol Cymru, wrth Senedd y Deyrnas Unedig, ac rwy'n dyfynnu, 'Hyd yn oed'—y gellid datganoli Ystad y Goron—'heb beryglu'r refeniw, ni fyddai hynny'n arwain at fwy o arian i Lywodraeth Cymru yn awtomatig, oherwydd fe wneid iawn mae'n debyg am unrhyw refeniw a gedwid drwy leihau'r grant blog, fel a wneir yn yr Alban. Oedd hi'n iawn?”
Ymatebodd Ysgrifennydd y Cabinet: “Dyma'n union pam rydym ni wedi sefydlu'r grŵp, i wyntyllu'r ystyriaethau ariannol, llywodraethu a phob ystyriaeth ymarferol arall.”
Meddai Mr Isherwood:
"Rydyn ni’n gwrthwynebu'r datganoli pŵer pellach hwn i Lywodraeth Cymru. Mae'n ddiangen ac yn anniogel!"