Heddiw, mae Mark Isherwood, AS Rhanbarthol dros Ogledd Cymru a Chadeirydd Grŵp Awtistiaeth Trawsbleidiol y Senedd, wedi tynnu sylw at achosion y Senedd o bobl awtistig yn cael eu gwrthod ar gyfer cyflogaeth oherwydd eu Hawtistiaeth ac mae wedi galw am "weithredu ymarferol, sy'n canolbwyntio ar ganlyniadau" gan Lywodraeth Cymru i fynd i'r afael â hyn.
Yn ystod cwestiwn i Ysgrifennydd y Cabinet dros yr Economi yng nghyfarfod y Senedd ddydd Mercher ar hyrwyddo gwaith teg yn y gogledd, dywedodd:
"Mae canllawiau Llywodraeth Cymru ar waith teg yn rhoi enghraifft ymarferol o sut olwg allai fod ar waith teg mewn amgylchedd gwaith, gan ddarparu cyfleoedd cynhwysol i gael gwaith, i gaffael a datblygu sgiliau a dysgu, ac i gamu ymlaen mewn gwaith.
"Roedd cyfarfod diwethaf y Grŵp Awtistiaeth Trawsbleidiol yn cynnwys safbwyntiau pobl awtistig ynghylch mynediad at gyflogaeth, gyda siaradwyr o Sir Ddinbych a Sir y Fflint.
"Fel y dywedodd rhywun wrthym, mae hi'n cael trafferth dod o hyd i swydd – Mae hi'n gwneud cais am swyddi lefel mynediad ac yn cael ei gwrthod bron ar unwaith, ac mae hi'n teimlo mai ei Hawtistiaeth yw’r rheswm. Mae hi hefyd yn rhan o grŵp cymdeithasol ehangach lle mae ei chyfoedion yn wynebu problemau tebyg. Dywedodd wrth y cyfarfod fod gan bobl systemau gweithredu gwahanol ond eu bod yn gyfartal, ac nad oedd angen help arni i newid ei CV gan mai'r broblem oedd agweddau cyflogwyr tuag at ei chymuned. Ar ôl blynyddoedd o eiriau cefnogol, pa gamau ymarferol yn canolbwyntio ar ganlyniadau y bydd Llywodraeth Cymru yn eu cymryd nawr i fynd i'r afael â hyn?"
Wrth ymateb, diolchodd y Gweinidog Partneriaeth Gymdeithasol i Mr Isherwood am rannu ei bryderon a dywedodd wrtho y byddai'n "adrodd yn ôl yn ei gylch wrth inni barhau i wneud mwy o waith yn y maes hwn".
