Heddiw, mae’r AS dros Ogledd Cymru a Chadeirydd Grŵp Trawsbleidiol ar Awtistiaeth y Senedd, Mark Isherwood, wedi galw ar Lywodraeth Cymru i ymateb i argymhelliad adroddiad allweddol y dylai 'awdurdodau lleol weithio gyda sefydliadau niwroamrywiaeth-benodol a’u cefnogi, ac ymgynghori â nhw ar y materion sy'n ymwneud â gwasanaethau awdurdodau lleol a'u hygyrchedd i unigolion niwrowahanol'.
Cododd Mr Isherwood y mater yng nghyfarfod y Senedd heddiw wrth holi Ysgrifennydd y Cabinet dros Gyllid, Cyfansoddiad a Swyddfa'r Cabinet.
Meddai:
"Mae adroddiad End Youth Homelessness Cymru, 'Youth Homelessness Through the Lens of Neurodiversity', a lansiwyd yn y Senedd ar 17 Ebrill, yn nodi: 'Yn rhy aml, nid ydym yn rhoi sylw i bobl ifanc sydd â chymysgedd o adfyd a niwroamrywiaeth yn eu bywydau'.
"Fel y noda ei gasgliad: 'Wrth wraidd niwroamrywiaeth mae'r ddealltwriaeth nad oes unrhyw unigolyn yr un peth', eto 'pan fyddwn yn cymryd yn ganiataol fod pawb arall yn meddwl yn yr un ffordd â ninnau —dyna pryd fydd problemau'n codi'.
"Sut y byddech chi'n ymateb felly i argymhelliad yr adroddiad y dylai Awdurdodau Lleol weithio gyda sefydliadau niwroamrywiaeth-benodol lleol a'u cefnogi, ac ymgynghori â nhw ar y materion sy'n ymwneud â gwasanaethau Awdurdod Lleol a'u hygyrchedd i unigolion niwrowahanol. Dylid sicrhau bod cyllid ar gael i'r sefydliadau hynny i ddarparu cymorth ac allgymorth i bobl ifanc niwrowahanol', lle mae'r adroddiad hefyd yn nodi:
'Mae atal bob amser yn fwy effeithiol na gorfod ymdrin â’r llu o broblemau unigol sy'n codi yn nes ymlaen ym mywyd unigolyn ifanc."
Yn ei hymateb, dywedodd Ysgrifennydd y Cabinet:
"Byddaf yn llwyr gydnabod y negeseuon pwysig rydych chi wedi'u cyflwyno nawr o ran pwysigrwydd deall niwroamrywiaeth", gan ychwanegu "Buaswn yn gobeithio, drwy rywfaint o'r buddsoddiad rydyn ni wedi'i wneud, fel ein cronfa arloesi digartrefedd ieuenctid, y gallem archwilio materion fel hynny".
