Heddiw, mae’r AS Rhanbarthol dros Ogledd Cymru, Mark Isherwood, wedi galw am ymyrraeth frys gan Lywodraeth Cymru i sicrhau setliad cynaliadwy ar gyfer darparwyr cartrefi gofal a dull cenedlaethol o osod ffioedd i ddarparu ffigur sylfaenol.
Cododd Mr Isherwood y mater yng nghyfarfod y Senedd heddiw ar ôl cyfarfod Fforwm Gofal Cymru yr wythnos diwethaf i drafod eu pryderon ynghylch cynnydd o ddim ond 3.71 y cant mewn ffioedd cartrefi gofal yn y Gogledd ar gyfer 2024-25.
Wrth siarad yn y Datganiad Busnes, galwodd Mr Isherwood am Ddatganiad brys ar y mater.
Meddai:
"Rwy’n gofyn am ddatganiad brys gan yr Ysgrifennydd Iechyd a Gofal Cymdeithasol ar ffioedd cartrefi gofal. Ar 6 Mehefin, ysgrifennodd Bwrdd Iechyd Prifysgol Betsi Cadwaladr at ddarparwyr gofal yn y Gogledd, gan nodi cynnydd o 3.71% yn unig yn ffioedd cartrefi gofal ar gyfer 2024-25, gan fethu â chyfateb â chynnydd awdurdodau lleol ac yn is hyd yn oed na chynnydd cyfartalog ffioedd Sir y Fflint o 5.33%, sef yr isaf yng Nghymru tan hynny.
"Mae'n golygu y byddai darparwyr yn derbyn llai am ddarparu Gofal Iechyd Parhaus na Gofal Nyrsio wedi'i Ariannu, er bod yr achosion Gofal Iechyd Parhaus yn fwy cymhleth a bod ganddyn nhw ofynion nyrsio ychwanegol.
"Ddydd Gwener diwethaf, fe wnaeth Gareth Davies AS a minnau gyfarfod â Fforwm Gofal Cymru i drafod eu pryderon am hyn. Fe wnaethon ni glywed bod gan y gogledd erbyn hyn y ffioedd cartrefi gofal isaf yng Nghymru, gan roi pwysau ar ddarparwyr i roi'r gorau i dderbyn cleifion Gofal Iechyd Parhaus newydd ac i roi rhybudd i'w preswylwyr presennol sy’n cael eu hariannu gan Ofal Iechyd Parhaus, canlyniad gofidus nad oes neb eisiau’i weld, ar yr union adeg pan nad yw’r angen erioed wedi bod yn fwy a bod taer angen y gwelyau cartrefi gofal hyn ar fyrddau iechyd. Felly, mae angen ymyrraeth frys i sicrhau setliad cynaliadwy a dull cenedlaethol o osod ffioedd i ddarparu ffigur sylfaenol. Rwy'n galw am ddatganiad brys yn unol â hynny.
Wrth ymateb i Lywodraeth Cymru, dywedodd y Trefnydd:
"Diolch yn fawr iawn, Mark Isherwood, am y cwestiwn pwysig iawn, ac rwy’n gwybod bod hynny'n rhywbeth y mae Ysgrifennydd y Cabinet dros Iechyd a Gofal Cymdeithasol yn ymdrin ag ef yn weithredol, ond nid yw ychwaith yn gwestiwn i Ysgrifennydd y Cabinet dros Iechyd a Gofal Cymdeithasol yn unig, yn amlwg mae'n gwestiwn i'r Gweinidog Gofal Cymdeithasol ac mae'n gwestiwn i Ysgrifennydd y Cabinet dros Dai, Llywodraeth leol a Chynllunio. Mae'r holl gyfrifoldebau trawslywodraethol hyn, cyfrifoldebau'r Cabinet, yn allweddol i ymdrin â'r mater hwn."
