Mae’r Aelod o’r Senedd dros Ogledd Cymru a Chadeirydd Grŵp Trawsbleidiol y Senedd ar Anabledd, Mark Isherwood, wedi galw ar Lywodraeth Cymru i droi gair yn weithred er mwyn mynd i’r afael â’r gwahaniaethu a’r anghydraddoldebau mae pobl anabl yn eu hwynebu bob dydd.
Wrth ymateb i Ddatganiad ddoe yn y Senedd gan y Gweinidog Cyfiawnder Cymdeithasol a’r Prif Chwip ar Ddiwrnod Rhyngwladol Pobl Anabl, tynnodd Mr Isherwood sylw at y rhwystrau a’r problemau y mae pobl anabl yn dal i’w hwynebu yng Nghymru.
Meddai:
“Weinidog, rydych yn dweud bod Llywodraeth Cymru’n benderfynol iawn o fynd i’r afael â’r gwahaniaethu a’r anghydraddoldebau y mae pobl anabl yn eu hwynebu bob dydd. Rydych wedi bod yn dweud hynny ers dau ddegawd a mwy. Fis Tachwedd y llynedd, 16 mlynedd ar ôl trafod yr ymgyrch Changing Places am y tro cyntaf yma, arweiniais Ddadl ar Doiledau Changing Places, gan ddweud bod diffyg cyfleusterau sylfaenol o’r fath yn gadael pobl yn anabl, wedi’u caethiwo, yn ynysig ac yn ddibynnol ar eraill.
Pa gamau ydych chi wedi’u cymryd ynghylch hyn ers hynny?
“Mae Cymdeithas Genedlaethol Plant Byddar Cymru wedi rhybuddio bod gostyngiad yn nifer athrawon plant byddar a phroblemau eraill gyda chyflwyno Diwygiadau Anghenion Dysgu Ychwanegol Llywodraeth Cymru yn rhwystro disgyblion anabl rhag defnyddio cyfleusterau hyfforddi addysgol. Mae ganddyn nhw Ddeiseb Senedd ar hyn hyd yn oed. Pa gamau ydych chi’n eu cymryd ar y mater hwnnw?
“Mae Anabledd Cymru’n bryderus iawn am y pwysau ariannol ar sefydliadau pobl anabl ledled Cymru, sy’n cael eu rhedeg a’u rheoli gan bobl anabl ac yn gweithredu fel eu llais yn eu cymunedau, yn cynnwys Canolfan FDF ar gyfer Byw’n Annibynnol yn Sir y Fflint sydd wedi’i lleoli yn Sir y Fflint (Fforwm Anabledd Sir y Fflint yn flaenorol), gyda dileu cyllid Awdurdod Lleol yn arwain at bwysau costau llawer uwch ar Wasanaethau Awdurdodau Lleol, a chreu arbedion ffug. Pa gamau ydych chi’n eu cymryd ar hyn?
“Yn olaf, pa gamau ydych chi wedi’u cymryd ynghylch y pryder cyson y mae pobl anabl ac awtistig a’u teuluoedd yn Sir y Fflint wedi’i godi gyda mi am y patrwm amlwg o feio a bwlio pan fydd rhiant yn mynegi pryderon dilys. Rwyf wedi tynnu sylw at hyn yma droeon, ac yn y cyfarfod STAND diweddar o Grŵp Cymorth Rhieni Sir y Fflint Gogledd Cymru pwysleisiwyd yr angen parhaus i hyfforddiant Anabledd ac Anghenion Dysgu Ychwanegol fod yn fwy nag ymwybyddiaeth yn unig, i rieni gael eu lleisiau wedi’u clywed, ac er mwyn cydymffurfio â deddfwriaeth.”
Wrth siarad ar ôl y cyfarfod, ychwanegodd Mr Isherwood:
“Nid eu hamhariadau sy’n anablu pobl anabl, ond y rhwystrau i fynediad a chynhwysiant y mae cymdeithas yn eu rhoi yn eu ffordd, ac mae’n rhaid i ni weithio gyda phobl anabl i ddileu’r rhain, gweld y byd trwy eu llygaid nhw, gan roi’r llais, y dewis, y rheolaeth a’r annibyniaeth iddyn nhw maen nhw am ei gael ac yn haeddu ei gael.”
