Mae AS Gogledd Cymru, Mark Isherwood, yn barod i gefnogi Diwrnod Siwmper Nadolig blynyddol Achub y Plant, a gynhelir eleni ddydd Iau 12 Rhagfyr.
Ers ei lansio yn 2012, mae’r Diwrnod Siwmper y Nadolig wedi codi dros £37 miliwn i helpu i drawsnewid bywydau plant ledled y byd. Mae'r arian a godir yn cefnogi plant yng Nghymru, y DU a ledled y byd i aros yn ddiogel, yn iach a dysgu.
Mae Achub y Plant yn annog y genedl i ddathlu ei ddiwrnod codi arian blynyddol ar Ddiwrnod Siwmper Nadolig mewn ffordd mor gynaliadwy â phosibl, drwy ailddefnyddio, ailgylchu a siopa'n fwy ymwybodol.
Yr wythnos hon, mynychodd Mr Isherwood ddigwyddiad Achub y Plant yn y Senedd i hyrwyddo'r diwrnod ac mae'n annog pobl o bob oed ledled y Gogledd i gymryd rhan.
Meddai:
"Gall pawb gymryd rhan yn Niwrnod Siwmper Nadolig Achub y Plant ar 12 Rhagfyr boed hynny drwy ychwanegu addurniadau at hen siwmper, ail-wisgo siwmper y llynedd neu gyfnewid campwaith gwlanog gyda ffrind. Yn ystod y cyfnod heriol hwn, gadewch i ni helpu i wneud y byd hwn yn lle gwell i blant trwy wisgo siwmper."
Gall cyfrannu £2 neu beth bynnag y gall pobl ei fforddio helpu i wneud gwahaniaeth:
- Gallai £2 brynu pecyn o hadau i deulu yn Kenya dyfu eu bwyd eu hunain, ar ôl i sychder ddinistrio eu cnydau
- Gallai £8 brynu blanced i gadw plentyn yn Wcrain yn gynnes drwy'r gaeaf
- Gallai £10 brynu taleb archfarchnad i deulu yng Nghymru.
- Gallai £36 ddarparu dŵr am chwe wythnos i ddau blentyn yn yr ysgol yn Somalia er mwyn iddynt allu parhau â'u haddysg.
- Gallai £85 brynu dwy afr i deulu yn Somalia fel bod gan deulu ffynhonnell incwm ac i ddarparu llaeth iach i'w yfed i'r plant.
Am ragor o wybodaeth ac i gofrestru, ewch i - christmasjumperday.org .
