Gyda rhai ardaloedd yng Ngogledd Cymru yn dal i gael trafferth cael signal ffonau symudol, mae Mark Isherwood, AS Gogledd Cymru, wedi holi Gweinidog yr Economi am gamau gweithredu Llywodraeth Cymru i fynd i'r afael â hyn.
Yng nghyfarfod y Senedd ddoe, gofynnwyd i'r Gweinidog sut mae Llywodraeth Cymru yn cefnogi prosiectau cysylltedd digidol yn y gogledd.
Yn ystod y cwestiwn, cyfeiriodd Mr Isherwood at gyfarfod a gafodd y llynedd gyda Digital Mobile Spectrum Limited (DMSL), sy'n ceisio ymestyn y ddarpariaeth yn y gogledd i 98% o ddarpariaeth 4G gan o leiaf un Gweithredwr Rhwydwaith Ffonau Symudol, a gofynnodd i'r Gweinidog pa gysylltiad y mae Llywodraeth Cymru wedi’i gael gyda'r cwmni.
Meddai:
"Yr haf diwethaf, ymunais ag Ymddiriedolaeth Genedlaethol Cymru ar gyfer ymweliad â phrosiect Dalgylch Conwy Uchaf a chyfarfod gyda Grŵp Gweithredu Cymunedol Cwm, i drafod diffyg signal ffonau symudol yng Nghwm Penmachno. Mewn cyfarfod dilynol gyda Digital Mobile Spectrum Limited (DMSL) a Grŵp Gweithredu Cymunedol y Cwm, buom yn trafod Rhaglen Rhwydwaith Gwledig a Rennir.
"Mae DMSL, fel y gwyddoch rwy’n siŵr, yn fenter ar y cyd rhwng pedwar Gweithredwr Rhwydwaith Ffonau Symudol y DU, i weithio dros fywyd digidol didrafferth i bobl ledled y DU. Mae’r Rhwydwaith Gwledig a Rennir, gyda £532 miliwn gan Weithredwyr Rhwydwaith Ffonau Symudol a £500 miliwn gan Lywodraeth y DU, yn ceisio ehangu'r ddarpariaeth yn y gogledd i signal 4G gan bob Gweithredwr Rhwydwaith Ffonau Symudol mewn 83 y cant o’r rhanbarth, a gan o leiaf un Gweithredwr Rhwydwaith Ffonau Symudol yn 98 y cant o’r ardal, ac, ledled Cymru, i 80 y cant gan yr holl Weithredwyr Rhwydwaith Ffonau Symudol, a 95 y cant gan o leiaf un Gweithredwr Rhwydwaith Symudol.
"Fel y clywsom, 'allwch chi ddim cael cysylltedd heb yr isadeiledd'. Sut rydych chi'n ymgysylltu â DMSL felly? "
Yn ei ymateb, dywedodd y Gweinidog, Vaughan Gething AS, y byddai'n holi ei swyddogion eto am "eu cysylltiad penodol â'r sefydliadau rydych chi'n cyfeirio atyn nhw".
